Shab E Miraj

Shab E Miraj

شبِ معراج النبی ﷺ

 

وقت    ٹھہرا    رہا،   چلنے    نہیں    پایا  اس شب

رب   نے  محبوب  کو  جب  پاس  بلایا   اس  شب

 

آٸے    جبریل    مرے    رب    کے    پیامی   بن   کے

مژدہٕ   دیدِ  خدا   انﷺ   کو    سنایا    اس    شب

 

فاصلے   آپﷺ   کے   قدموں    تلے    پامال   ہوٸے

میرے   آقاﷺ   نے   تھا   براق   اڑایا    اس    شب

 

آن  کی  آن    میں   اقصیٰ   میں   سواری   پہنچی

مقتدی   نبیوں  کو  آقاﷺ   نے    بنایا   اس    شب

 

سارے   افلاک   کھُلے   جاتے  تھے  انﷺ  کے   آگے

رب  نے  کیا  کیا  نہ  انہیں  صاف  دکھایا اس شب

 

قاب  قوسین   سی   نزدیکی   ملاقات   میں   تھی

رب   نے    محبوب   کو    ہر  راز  بتایا   اس   شب

 

اپنی   امت   کے  لیے  مانگ  لی  بخشش  رب  سے

عاصیوں  کو بھی  کہاں انﷺ نے  بھلایا اس شب

 

حور  و غِلماں  تھے  مچلتے  کہ  سلامی  دیں اُنہیں

لے  کے  رضواں  جو اُنہیں  خلد  میں  آیا اس  شب

 

تحفہ   امت   کے   لیے   لاٸے   نمازوں   کا   نبیﷺ

جب درودوں کی تھی ان پر گھنی چھایا اس  شب

 

قابلِ    رشک   ہے    یہ   بات   کہ  جبریل  نے  بھی

انﷺ  کی سنگت میں بہت  لطف اٹھایا  اس شب

 

سلسلہ   وار      تھے     پر نور      نظارے     سارے

قدسیوں   نے   تھا   حیاؔ   عرش  سجایا  اس  شب

 

ماہم حیا صفدر